Bhuel….tá samhradh eile thart anois, agus seachtain Ghaeilge eile thart chomh maith.  Bhí an-spórt ag na freastalaithe go léir, mar is gnáth:  bia blasta, comhluadar cairdiúil agus spreagúil, agus neart scoláireachta—bhí siad go léir le fáil tríd an tseachtain Ghaeilge in Esopus i mbliana.  Ceithre rang Ghaeilge a bhí ar siúl i dtrí seisiún gach lá, agus bhí níos mó ná ochtar mac léinn i láthair go hiomlán.       

        Agus na páistí….!  Ní raibh an oiread sin páistí linn riamh roimhe sin—beagnach fiche idir ghirseach agus ghasúr, ag freastail ar naionrá agus “ranganna glan-thosaitheoirí,” lenár nEthel i gceannas orthu.  Mar a deirtear:  tús maith, leath na hoibre!

        Ar ndóigh, bhí múinteoirí den scoth againn arís i rith na seachtaine:  Eibhlín Zurell, Pádraigín Collum, Rath  DeHoust, Walter Stock, Maitiú Tully, Séamus McCabe, agus Donncha Ó Cuinn ar an leath lá saoire (tráthnóna Dé Céadaoin). 

        Freisin, bhí cailín cliste linn i mbliana mar mhúinteoir ard-rang:  Caitríona Ní Chléiricín, as Muineachán.  Is mac léinn í féin í Caitríona, ag freastail ar Coláiste na hOllscoile i mBaile Átha Cliath faoi láthair, agus ag múineadh daoine fásta le Bord na Gaeilge. Seo a céad chuairt go Meiriceá ach tá súil againn go bhfeicfimid í ar ais arís linn..…

    I measc buaiceanna eile na seachtaine: 

    -- ranganna ceoil gach lá:  bhí Gobnait agus Siobhán, na múinteoirí, ar fheabhas, agus bhí grúpa “féin-mhúinte” ar an bhfeadóg stáin

  -- léacht an-suimiúil faoi rúndiamhra na teanga Breatnaise, le Walter Stock

                                                -- taispeántas iontach faoi thuras fada ar an Appalachian Trail (beagnach 2,200 míle ar fad, ó Georgia go Maine!), le Noel Cotter

-- dúnmharú (bréagach!), le leideanna le bheith réitithe ag na rannpháirtithe — “Cé a rinne é?”

        -- lá spóirt i lár na seachtaine, le Stiobhárd agus Liam mar stiúrthóirí.  Bhí cluiche “Truth or Dare” ann, le ceithre fhoireann in aghaidh a chéile.  Roimh deireadh an chluiche, bhí cúpla pióg uachtar caite i gcúpla aghaidh…(!)

                                        -- ceardlanna damhsa ar siúl gach oíche sa ghiomnáisiam le Noel Cotter —cleachtadh maith roimh an gcéilí oíche Dé hAoine

     -- bailiúchán scannáin éagsúla, i nGaeilge agus i mBéarla, ar fáil chun sos a sholáthair tar éis na laethanta fada ag foghlaim Gaeilge!

        -- agus an céilí mór ag deireadh na seachtaine, le spraoi agus spóirt agus “party pieces” ón ngrúpa go léir!

        Ar feadh na seachtaine, bhí ár smaointe agus ár gcroíthe lenár gcairde as láthair i mbliana—go háirithe le Seán Tierney.  Go mbeannaí Dia sibh, go dtí an am seo arís…. 

        Agus míle buíochas arís le hEthel agus a foireann as ucht seachtain iontach eile.