A chairde
Ba mhaith liom mo bhuíochas a chur in iúl do gach duine a bhí páirteach i mo shuirbhé ar líne i mí na Márta seo caite agus mé in mbun tráchtas MA a scríobh faoi áiseanna fhoclóireacht na Gaeilge. Má tá suim ag aon duine breathnú ar an obair agus ar thorthaí an tsuirbhé, tá leagan den tráchtas ar fáil anois ag an wordpress blag seo:
http://barrdotheanga.wordpress.com Déantar anailís ar an taighde i gCaibidil 6 agus tá sonraíocht an tsuirbhé ar fáil in Aguisín 6. Cuirim fáilte roimh bhur dtuairimí agus bhur moltaí agus is féidir plé a dhéanamh ina leith ar leathanaigh an bhlag.
Ós foghlaimeoir agus mac léinn mé, is cinnte go bhfuil mo thráchtas lochtach ar go leor bealaí éagsúla, agus mar gheall ar an am teoranta a bhí ceadaithe don obair bheadh neart in easnamh freisin.
Ach is é an fáth go bhfuil mé ag scaipeadh an taighde seo go poiblí inniu ná gur mian liom díospóireacht agus suim a spreagadh i bhur measc faoi na deiseanna atá ann le foclóir mór aonteangach Gaeilge a chur ar fáil ar líne ar chostas íseal agus laistigh de thréimhse sách gearr.
Déanfar cur i láthair ar an ábhar céanna ag an gcomhdháil teanga: 1st International Language Conference at NUI Galway; Translation, Technology and Autonomy in Language Teaching and Learning a bheidh ar siúl in Ollscoil na hÉireann Gaillimh, 10/11 Nollaig. Chuirfinn míle fáilte roimh aon duine a bheidh ag freastal ann.
Gabhaim buíochas ó chroí arís do gach duine a ghlac páirt sa suirbhé agus a chabhraigh le mo chuid taighde a thabhairt chun críche.
Is mise le meas
Liz Warren
(Éilis Uí Mhuirneáin)