An amhlaidh go bhfuil áis Ghaelainne eile curtha faoi chois nó cá bhfuil feasachán clóbhuaillte na nuachta de chuid RTE.ie?

Ba ghnáth dom sciuird isteach ann ar bhonn laethúil nach mór le h-achoimre nuachta ón seanfhód a léamh.

Murach "an Druma Mór" ní bheadh faic fágtha ó thaobh na nuachta laethiúla de.

Ní fios dom cé acu is cóngaraí dom: racht feirge nó fonn urlacain.

Beidh na seirbhísí ar An Druma Mór ag bogadh chuig www.nuacht24.com go luath, creidim. Tá cuma an-mhaith ar an suíomh sin. Ach tá an ceart agat, gur náire mór é nach bhfuil RTÉ ag cur na seirbhíse seo ar fáil. Pobal na Gaeilge féin atá ann.

wow tá cuma álainn air...

Ní fhaca mé an suíomh sin riamh. Cé a chuir é le chéile? Ní féidir liom aon fianaise a fháil ar an suíomh fhéin.

Tá cuma álainn air ceart go leor ach tá cuma costasach air chomh maith! Tá súil agam go maireann sé agus go gcuirfear núachtán clóite ar fháíl freisin (feicim go bhfuil alt ann faoi Foras na Gaeilge agus an conradh Foinse).

Chuir Eoghan Ó Neill & a chairde le chéile é nuair a bhí siad ag cur isteach ar Chonradh do nuacht físe. Níl fhios agam an bhfuil sé beo ó shin - tá an cuma air go bhfuil sé ag obair ar an suíomh blogger go príomha faoi láthair.

A Dhiarmo!

Is suíomh iontach é nuacht24.com agus tá súil agam go n-éireodh go geal leis an dream fonnmhar díograsach úd atá taobh thiar den tionscnamh sin.

Ach lena chois sin, tá dualgas ag an stát seirbhís a chur ar fáil trína h-eagraíochtaí stáit fhéin, a bheadh ag freastal ar riachtanais an phobail a bhfuil breaceolas maith ar an nGaelainn acu, le hiad a mhealladh chuig an teanga agus le a bheith ag cabhrú dóibh an bhearna mhillteach siúd a líonadh a bhíonn fós ann nuair a fhágann daltaí an scoil.

Ba leor ar dtús suíomh faisnéise a chur ar fáil ina mbeadh cur síos neodrach ann ar chúrsaí an lae (nó cúrsaí na seachtaine ar dtús) idir chúrsaí nuachta, chúrsaí spóirt, chúrsaí siamsaíochta srl.

Áis fhoghlamtha a bheadh ann a mbeadh mar phríomhaidhm aici na téarmaí gaelacha a chur i mbéal an phobail ionas go mbeadh an pobal in ann plé le cúrsaí reatha agus iad a phlé trí mheán na Gaelainne. Is é an taithí atá déanta agam ná gur dodhéanta ar fad é páirt a ghlacadh i gcomhrá faoi rud éigin mura bhfuil buntéarmaíocht an ábhair ar mo chumas agam.

Ba chóir go mbainfí an-úsáid as leaganacha dátheangacha agus gluaiseanna chun an rud a éascú chomh fada agus ab fhéidir.

Agus ba chóir go mbeadh roinnt mhaith de na h-ailt le leagan labhartha díobh agus cainteoirí dúchais i mbun na tráchtaireachtaí labhartha.

Lena h-ais sin agus sa chaoi chéanna d'fhéadfaí ciclipéid Ghaeilge-Gaeilge a bhunú agus d'fhéadfaí a bheith ag cur leis de réir a chéile.

Ní mhairfidh an teanga go deo dá mbeadh sí ag brath ar an gcúpla focal i dteannta leis an gcraic-agus-ceolachas.