house work (obair baile) and homework (obair bhaile)?

An chéad cheann: obair tí

An dara ceann: obair bhaile

Níl a fhios agam cén fáth nach séimhítear "tí", ach is é sin a deirtear.

An ceart agat. B'fhéidir go bhfuil a fhios agat i ngan fhios duit féin a Dennis, murar tú a thagair don 'gloine fíona' agus 'gloine fhíona' anseo cheana.
B'fhéidir gur thagair Aonghus dó tamall ó shoin.

quote:

murar tú a thagair don 'gloine fíona' agus 'gloine fhíona' anseo cheana

Ní mise a phléigh é. An é "gloine a bhfuil fíon inti / gloine le haghaidh fíona" vs. "gloine atá déanta as fíon (!)" atá i gceist? Ach níl an "obair bhaile" déanta as "baile". Cabhrú, led thoil!

Ní mise, go díreach, Abi a d'ardaigh an cheist úd.

Ceist is ansa le haos gramadaí, an mbíonn brí seimeantach le seimhiú.

Táid ann a níonn an difear úd a fheiscint idir obair tís agus obair scoile atá le déanamh sa mbaile.

Tinneas chinn a chuireann a leithéid ormsa.

Abigail go deimhin.

Sea, mar a bhí thuas, obair tí agus obair bhaile.
D'fhéadfaí 'obair baile' a reic le hobair sa mbaile a chur in iúl chomh maith ar ndóigh, nár 'obair bhaile' an mhúinteora í.
Déarfainn féin, is dóigh liom: ní soithí, giotamáil tí, glanadh, nó sciúradh, scuabadh srl. Níor rith sé liom 'obair baile' a rá, is dócha mar gheall nach mbím i gcomhluadar daoine a dhealódh lena chéile an leagan faoi shéimhiú is leagan na loime. (Faoi dhó nó faoi thrí a chasaim le daoine anois, tharla in áit an-scoite mé.)

Guilty as charged!

Taitníonn a leithéid seo de cheist liom i gcónaí... ach amháin nuair a bhím ag iarraidh labhairt. Ní bhíonn go leor ama agam i lár comhrá le cuimhneamh ar na rialacha, agus níl an rud féin chomh paiteanta sin agam go mb'fhéidir liom déanamh dá n-uireasa.

Seo mar a thuigim é, ar aon nós:

gloine fíona - gloine atá lán d'fhíon, nó lán gloine d'fhíon ("glass of wine", le dul i muinín an Bhéarla)
gloine fhíona - gloine de chineál áirithe ("wineglass")

Ar ndóigh, ní mór eatarthu go hiondúil. Mar shampla,
ubh circe - ubh ar le cearc í
ubh chirce - ubh de chineál áirithe (an cineál a bhéarfadh cearc)
Fág scéalaíocht Hans Christian Andersen as an áireamh agus is beag cás inar chóir dealú eatarthu! Mar an gcéanna an uimhir gutháin (uimhir a bhaineanns le guthán) agus an uimhir ghutháin (uimhir de chineál áirithe, bíodh an uimhir áirithe féin bainteach le fón nó ná bíodh.)

Ach tá roinnt eiseamláirí suntasacha a bhfuil fíordhifear seimeantach i gceist leo:
gloine fíona/fhíona (nó beorach/bheorach, nó cibé a bheas agat féin...)
cos maide/mhaide
culaith mairnéalaigh/mhairnéalaigh


Rud eile de: níl an séimhiú féin le brath ach i gcás ainmfhocail bhaininscní agus consan inséimhithe ina dhiaidh, ar ndóigh, ach is féidir an difear céanna a fheiceáil i ngnéithe eile den ghramadach, mar shampla in ord na haidiachtaí:
cupán tae - "cup of tea" nó "teacup"
ach
cupán beag tae - "small cup of tea"
cupán tae beag - "small teacup"


Dála an scéil, seo atá faoi deara na conspóide a chloistear anois is arís faoi Gaeilge a chur ar an "good weekend" (.i. cé acu is cirte "deireadh seachtaine maith" a rá nó "deireadh maith seachtaine.") Braitheann sé ar an léamh a ghlacann tú ar an bhfrása "deireadh seachtaine." Bheinn féin sásta le ceachtar den dá leagan (ach bheadh claonadh agam chun an chéad cheann.)

Ós é “deireadh seachtainí” atá ag muintir na Gaeltachta mar iolra, tá chuile chosúlacht ann go bhfuil an chéad cheann níos cirte.

quote:

gloine fíona - gloine atá lán d'fhíon, nó lán gloine d'fhíon ("glass of wine", le dul i muinín an Bhéarla)
gloine fhíona - gloine de chineál áirithe ("wineglass")

Ach níl FGB ar aon intinn leat:

gloine, ... ~ fíona, wine-glass; glass of wine.

Maidir le "deireadh seachtaine", aontaím le Peter agus le lucht na Gaeltachta. Is aonad é. Deirtear "finde" i leaba de "fin de semana" sa Spáinn na laethanta seo, dála an scéil: "que tengas un buen finde", mar shampla.

Céard faoi "clár éadain"?